News

Jeisi Migger-Archiv wird den Alte Stainlemer übergää

 Aber zrugg zem Emil «Migger» Jeisi. Dä isch wääred vyle Joor Pfyfferchef vo de Stainlemer gsi und het 1931 der Marsch «Glopfgaischt» initiiert. Der Migger Jeisi isch Wirt gsi. Us däm Grund het är woorschynlig brobiert der Fasnachtszyschdig z beläbe, wo zue däre Zyt no fascht fasnachtsfrei gsi isch. Zem Lüt in d Stadt und sy Baiz z logge, het er also e Guggemusig gründet. Mitgmacht hän e baar Stainlemer und Musiger vo der no junge Swingband «Lanigiro», wo spöter internationali Karriere gmacht het.

Will der Migger Jeisi und anderi Mitgliider bi de Stainlemer Fasnacht gmacht hän, isch d Jeisi Migger-Gugge nummen am Fasnachtszyschdig gloffe. Das isch au noon em Dod vom Migger Jeisi im 1953 eso bliibe. Die Guggemusig isch nien e Verain gsi, syt fascht 100 Joor exischtiert sy also ooni fechtgschriibeni Struggdure. Us däm Grund sin aber au alli Aggte, Fotteli und Gegeständ wie Bächer usw. an ganz verschiidenen Ort verstreut gsi. Im Hiibligg ufs 100 Joor-Jubiläum im 2026 sin d «Jeisi Migger» dra e Chronik z schrybe. Doderzue hän sy alli Archivmaterialie gsammlet. Und die sin jetzen am 19. Abrille den Alte Stainlemer zer Ufbewaarig übergää worde.

Dasch e grossi Eer und Verpflichtig. Au wenn scho lang kaini Stainlemer mee bi der Jeisi Migger-Gugge mitschränze, hän doch baidi Gruppierige nie vergässe, wo d Ursprüng vo der eltschte no exischtierende Guggemusig liige 

 Und do nomoll der Video vom Ständeli, wo d Jeisi Migger de Stainlemer am Fasnachtszyschtig brocht hänn: 

Kommentare (0)